miércoles, 23 de mayo de 2007

Chocolate

OPINIÓN
Chocolate
Servicios
Enviar esta página
Imprimir esta página
Contactar
Anterior
Volver
Siguiente
Cuando nomamos la palabra chocolate, espiértansenos los sentíos del gustu, del olfatu y un regustín recuérrenos el cuerpu. Nun ta mal poner una nota dulce nestos díes de campaña ellectoral, nos que toos tamos sollertes a ver si los políticos nos que confiamos nos ufiertan un bon programa pa los próximos cuatro años. Pa reflexonar ye bien prestoso tomar una chocolatada que nos anime l'espíritu. Porque, según los espertos, el cacáu, componente básicu del chocolate, tien bones propiedaes pal organismu. Llixeramente estimulante, proporciónanos un estáu de felicidá que, anque seya momentaneu, val la pena. Cuando comemos chocolate les endorfines cuerren pel cuerpu. Según les últimes investigaciones, el cacáu y los sos derivaos apórtannos antioxidantes al organismu, resulten beneficiosos pal corazón y les arteries y reducen la tensión arterial. De xuru que quien padez malures rellacionaes con estes partes del cuerpu tará encantáu de qu'un alimentu tan ricu pueda comelu ensin reparos. Nesti mundu nel que too son prohibiciones, menos mal que nos ufierten dalgo de lo que se puede disfrutar. Y esta vez tóca-y al chocolate, emponderáu polos investigadores con tolos meyores atributos nutritivos: mui ricu en minerales como'l calciu, el potasiu (que reduz la tensión arterial), magnesiu (responsable nel aprovechamientu de la enerxía), fósforu (rellacionáu cola salú de los güesos y l'actividá cerebral) y, amás, ricu en vitamines B1 y B6 y ácidu fólicu. Otros de los sos componentes esenciales activen los receptores cerebrales implicaos na llucidez mental, la felicidá y el placer. O sea, que saboriamos unos cuantos bombones y aportamos al organismu una bona dosis de nutrientes importantes, amás d'elevar l'espíritu y llevanos a la felicidá, tan buscada. Lo malo d'esto ye'l preciu, y de xuru que cuando se «corra la onda» de les bondaes d'esti manxar los precios pondránse poles nubes. D'estes coses siempre hai quien s'aprovecha. Queda soterrada tola mala prensa del dulce del amor, yá nun engorda tanto como nos asustaben, nun provoca migrañes nin granos nin na, y el que sufra estos efeutos serán por otres causes. Hai que tener en cuenta que dende hai cuatro sieglos el chocolate foi motivu de debate dende lo teolóxico a lo nutricional y terapéutico. El primeru n'abrir esti debate foi Antonio León Pinelo, cuando nel añu 1636 publicó una obra baxo'l títulu «Questión moral si el chocolate quebranta el ayuno eclesiástico». La preocupación moral manifestábase naquel entós pol gran espardimientu per Europa d'esti productu que nel so orixe tomábase frío, amargo y con picantes en parte de lo que güei ye México y Guatemala, y que los españoles endulzamos al gustu convirtiéndolu nun productu de gran aceptación. La esmolición llegó a tal puntu que'l mesmu Papa Paulo V viose forzáu a emitir el so autorizáu xuiciu: «El chocolate, amás de ricu, saludable y nutritivu, taba en paz con Dios». Nel sieglu XX foi cuando cayó sobre él toa una riestra de malos efeutos. Pero les recientes investigaciones apunten con fuercia a les sos escelencies pa que podamos saborialo con tranquilidá y placer. Y esto préstanos creelo. Comer chocolate ye bono pal cuerpu y pal alma, y non sólo por vía dixestiva: los baños y masaxes de chocolate tamién tán de moda; la chocolaterapia forma parte de los novedosos tratamientos de «belleza» y tien la ventaxa de qu'esta forma de consumilo allisa la piel, relaxa la mente y el so aroma espierta la pituitaria. Dempués de saber de tolos sos beneficios nun vamos a resistinos a probalo de toles formes posibles: pasteles, bombones, a la taza... pero tamién probaremos a enllordianos d'esta pasta milagrera pa disfrutar d'una relaxación total. Nun cabe dulda de que güei sabemos muncho más sobre los productos de consumu que nos ufierta'l mercáu como nutrientes, anque dempués faigamos casu de lo que nos da la gana, de lo que más nos convién en cada momentu. Poro, de les escelencies del chocolate vamos aprovechanos toos. Quién se va resistir a esti productu llambión, dulce, suave y viciosu. Dalgunos investigadores inda van más allá y dicen que les sensaciones de placer que nos aporta seméyense a les sensaciones del amor y a les sensaciones sexuales... Si de verdá fuera asina, quién sabe si los fabricantes nun daríen abastu con tantos pidíos. De lo que nun cabe dulda ye de qu'esti productu rei al que se-y atribuyen tantos bonos efeutos corporales y anímicos va desatar y facer medrar tolos negocios al rodiu del cacáu. En pocu tiempu, les chocolateríes, bomboneríes y les cabines de chocolaterapia llegarán a saturase, porque ye que somos asina, fáciles de convencer, y si se trata de dalgo tan dulce y llambión nun duldaremos un res; toos tábemos deseando que los investigadores dieren esti pasu: el chocolate ye bono pa la salú del cuerpu y del alma y podemos disfrutar comiéndolo. ¡Y nós creemos en tolo que nos presta!

No hay comentarios: