sábado, 24 de marzo de 2007

Zombis
M.ª ESTHER GARCÍA LÓPEZ
Servicios
Enviar esta página
Imprimir esta página
Contactar
Anterior
Volver
Siguiente
Un zombi ye, n'orixe, una figura llexendaria propia de los llugares onde se practica'l cultu vudú. Ye un muertu resucitáu por medios máxicos a traviés de rituales fechos por un bruxu y pa los qu'utilicen yerbes y bebedizos y fan práctiques de maxa negra, pa convertilu n'esclavu, poder facéi mandaos de too tipu y consiguir asina los sos propósitos, casi siempre malvaos. En lliteratura, fálase de muertos vivientes que se puen manipoliar por daquién con fines non tán bonos, y, vulgarmente, llámase-y zombi a quien fai les coses ensin pensales, como un autómata, a quien anda en tontu pola vida. Pero los zombis que m'ocupen güei son otros. Los zombis llexendarios puen danos ciertu respetu. Nun cabe dulda qu'a naide-y presta pensar qu'hai xente que con ritos diabólicos faiga del ser humanu un pelele obediente. Esto ye dalgo espantible. Pero güei hai otros zombis más espantibles entovía que llegaron colos avances teunolóxicos a los nuesos llares en tolos llugares del mundu. Un zombi yá nun ye esi ser resucitáu que vemos nes películes, que nos da pánicu; un zombi agora ye dalgo muncho más cercanu y que pue convivir con culaquiera de nós na nuesa casa, casi siempre ensin sabelo, y, cuando nos damos cuenta igual yá ye tarde pa solucionar el desastre que nos puede producir, faciendo usu de los datos y archivos que guardamos nel ordenador o destruyéndolos. Güei a quien tenemos que tener mieu ye a los ordenadores-zombi que toos podemos tener actuando na nuesa casa mandaos por daquién espertu en «pócimes informátiques». La palabra «zombi», en sentíu figuráu, sirve tamién pa nomar a los ordenadores que tán poseíos polos «bruxos» de la teunoloxía. Naide de nós fai unos años camentamos en tener un zombi tan cerca, mesmamente enriba la mesa del nuesu escritoriu. Un zombi peligrosu qu'obedez órdenes d'espertos dende sitios bien llonxanos y qu'a traviés del espaciu virtual pue convertise nel chivatu más eficaz actuando sobre los documentos archivaos qu'aporten datos relevantes sobre la nuesa vida. La máquina conviértese nun zombi que surxe dempués de ser infectáu por dalgún tipu de malware: virus, troyanos, guxanos, spam, etcetra, con fines perversos y qu'amás de causar nel ordenador malures, munches veces incurables, tienen otros oxetivos como atropar información sobre l'usuariu o estrozalu dafechu eliminando los archivos necesarios pal arranque o, lo que ye peor, usalu como ponte pa entrar n'otros ordenadores, llegando a poseer los espertos informáticos toda una rede de datos pa usalos nel momentu oportunu. Los zombis multiplíquense a traviés de medios teunolóxicamente perfectos. Ensin entrar nos desastres qu'estos virus causen nel ordenador, que son munchos y mui variaos, lo que más nos asusta ye que los pirates informáticos, usando la nuesa máquina como un auténticu zombi, puen caleyar pola nuesa casa y enterase de los nueses intimidaes, amás de manexar la información que guardamos, información relevante que puede convertise nun peligru pa nós. Los profanos na materia nun llegamos a saber, realmente, hasta ónde puen llegar con too esto, pero podemos sufrir les sos graves consecuencies. Nun cabe dulda que los zombis esisten, tenemos un zombi en potencia en cada llar. A ello collaboren los «bruxos informáticos» con sofisticaes técniques muncho más eficaces y de más alcance, de xuru, que les qu'empleguen nes cultures tradicionales anque tampoco seyan del nuesu agradu.
Inicio

No hay comentarios: