La llei seca
Mª Esther García López
L’alarma social que provoca na nuesa dómina’l consumu abusivu d’alcohol por una bona parte de la mocedá, dende edaes mui tempranes, llevó a la Ministra de Sanidá y Consumu, Elena Salgado, a proyectar una llei pa la protección de la salú y la prevención del consumu de bebíes alcohóliques polos menores. Esta proposición de llei, amás de les prohibiciones de venta d’alcohol a menores y del so consumu en llugares públicos, llevaría a regular la publicidá de bebíes alcohóliques nos medios de comunicación, dalgo que determinaos sectores sociales, ente ellos l’educativu, llevamos tiempu reclamando.
Pero la propuesta espertó les protestes de los empresarios del vinu y de la sidra, que ven mermaes les posibilidaes d’espansión del so negociu. Paez ser qu’esta llei va prohibir beber alcohol al aire llibre y, visto asina, podríen peligrar fiestes de prau, xires y romeríes, espiches y demás eventos y celebraciones onde rueden la sidra y el vinu, una amenaza pa les tradiciones festives asturianes.
Nun dexa de ser esta una midida drástica y yá se empieza a cavilar sobre’l so desarrollu. Salta a la vista que va ser una llei polémica. Quiciabes tenga que ser mui clara a la hora d’especificar llugares y consumidores. Y nun cabe dulda que se presenten otros problemes añadíos, porque’l consumu d’alcohol ta afitáu socialmente y anque siempre hubo problemes graves al so alredor, güei entovía s’agravaron más y ye difícil qu’una llei solucione un problema social de tal magnitú.
La palabra prohibir nun nos presta a naide, pero la sociedá ta enllena de prohibiciones, y cada vez más. Otres palabres como educación, prevención, información, diálogu… tán na mente de toos, pero ¿pónense los medios pa qu’esto funcione? La práctica diaria recuérdanos continuamente que, tristemente, munches veces hai que recurrir a la llei pa resolver los graves conflictos sociales que se nos presenten, quiciabes seya ésta la salida más fácil.
Nun cabe dulda qu’hai qu’atayar de dalguna manera’l consumu abusivu d’alcohol por parte de los mui xóvenes, principalmente, asociáu a la falta de control familiar, a la falta d’educación pa la salú y que trai emparexaes consecuencies mui graves a curtiu plazu. Munches families tán sufriendo los graves efectos que l’alcohol causa nos sos miembros adolescentes, repercutiendo nel so comportamientu. Un problema que lleva medrando dende hai unos cuantos años, cola llegada de la “movida”, y cada vez afecta a neños y adolescentes que s’anicien nel consumu dende los doce- trece años. Los resultaos de les encuestes son claros nesti sen y nun voi repitir equí cifres y porcentaxes que ya conocemos; namás fai falta dase una vuelta polos llugares de diversión y de xuru que nos convencemos de que los datos que nos dan las estadístiques aproxímense muncho a la realidá. El consumu escesivu d’alcohol, anque seya en fines de selmana y fiestes, trai consigo otros problemes añadíos: adicción, violencia, accidentes de tráficu, delincuencia y consumu d’otres drogues que güei tán presentes nos llugares de “movida”. Per otru llau, rómpese la comunicación familiar, faciéndose difícil el diálogu ente pas y fíos. Y otros efectos a más llargu plazu que yá nos anuncian los profesionales de la salú, como enfermedaes mentales prematures. El problema ye seriu.
Ta claro qu’esti comportamientu d’una bona parte de la mocedá, escapósenos de les manes y esto llevó a la ministra a intentar poner midíes drástiques que protexan la salú de la xuventú española, proyectando una llei seca, que nun ye bien acoyida y que se dulda de la so eficacia si nun se sofita con otres midíes sociales de prevención. Hai munches coses por solucionar que pueden influir n’esti desmadre xuvenil: el paru, los empleos en precariu, los sueldos polos suelos, contratos basura, problemes p’adquirir una vivienda, son dalgunes de les calamidaes sociales que tán sufriendo los xóvenes. Pa solucionar estos problemes tamién habría que llexislar con urxencia.
Y nesta situación social plantéase que la llei nun afecte a les nueses romeríes, espiches nin otros actos festivos, pero, verdaderamente, nun tará mal un poco de control, pa que les fiestes dexen de ser namás qu’un pretestu pa la mocedá pa facer “botellón” ensin enterase de nengún otru actu, porque nun-yos interesa. En munches romeríes y fiestes, hai una total dixebra na forma de viviles; mientres los pas y los güelos, s’esfuercen por mantener les tradiciones festives, la mocedá vive la nueche al son del “botellón” y durme de día ensin interesase por nada más y rompiendo too vínculu comunicativu y familiar. Toos sabemos que nun vamos a pidir a los xóvenes divertise como vieyos, porque esto iría contra la “llei natural”, pero, nos últimos años, percibese tamién nes celebraciones festives el nomáu abismu xeneracional.
Dalgunos espertos nel tema, consideren el vinu, y la sidra como alimentos. Toos sabemos que’l vinu emborracha, la sidra tamién, la cerveza y el calimochu lo mesmo. Too depende de la cantidá que se beba. Lo importante dende llueu ye educar, informar, prevenir, dialogar…educar a los más xóvenes pa un consumu responsable y amparalos socialmente pa que nun pierdan la ilusión y nun s’abelluguen n’notres práctiques de riesgu pa la salú.
Esperemos que la Ministra estudie toles posibilidaes y la redacción de la futura llei nun seya tan drástica como paez; que la so puesta en práutica ayude a meyorar la salú de la población y que nun seya peor el remediu que la enfermedá; que la Sra. Ministra vaya pensando n’otres midíes sociales que favorezan la integración social de la nuesa mocedá. Tampoco hemos escaecenos los adultos de que nós somos l’espeyu nel que se miren los xóvenes.
Mª Esther García López
L’alarma social que provoca na nuesa dómina’l consumu abusivu d’alcohol por una bona parte de la mocedá, dende edaes mui tempranes, llevó a la Ministra de Sanidá y Consumu, Elena Salgado, a proyectar una llei pa la protección de la salú y la prevención del consumu de bebíes alcohóliques polos menores. Esta proposición de llei, amás de les prohibiciones de venta d’alcohol a menores y del so consumu en llugares públicos, llevaría a regular la publicidá de bebíes alcohóliques nos medios de comunicación, dalgo que determinaos sectores sociales, ente ellos l’educativu, llevamos tiempu reclamando.
Pero la propuesta espertó les protestes de los empresarios del vinu y de la sidra, que ven mermaes les posibilidaes d’espansión del so negociu. Paez ser qu’esta llei va prohibir beber alcohol al aire llibre y, visto asina, podríen peligrar fiestes de prau, xires y romeríes, espiches y demás eventos y celebraciones onde rueden la sidra y el vinu, una amenaza pa les tradiciones festives asturianes.
Nun dexa de ser esta una midida drástica y yá se empieza a cavilar sobre’l so desarrollu. Salta a la vista que va ser una llei polémica. Quiciabes tenga que ser mui clara a la hora d’especificar llugares y consumidores. Y nun cabe dulda que se presenten otros problemes añadíos, porque’l consumu d’alcohol ta afitáu socialmente y anque siempre hubo problemes graves al so alredor, güei entovía s’agravaron más y ye difícil qu’una llei solucione un problema social de tal magnitú.
La palabra prohibir nun nos presta a naide, pero la sociedá ta enllena de prohibiciones, y cada vez más. Otres palabres como educación, prevención, información, diálogu… tán na mente de toos, pero ¿pónense los medios pa qu’esto funcione? La práctica diaria recuérdanos continuamente que, tristemente, munches veces hai que recurrir a la llei pa resolver los graves conflictos sociales que se nos presenten, quiciabes seya ésta la salida más fácil.
Nun cabe dulda qu’hai qu’atayar de dalguna manera’l consumu abusivu d’alcohol por parte de los mui xóvenes, principalmente, asociáu a la falta de control familiar, a la falta d’educación pa la salú y que trai emparexaes consecuencies mui graves a curtiu plazu. Munches families tán sufriendo los graves efectos que l’alcohol causa nos sos miembros adolescentes, repercutiendo nel so comportamientu. Un problema que lleva medrando dende hai unos cuantos años, cola llegada de la “movida”, y cada vez afecta a neños y adolescentes que s’anicien nel consumu dende los doce- trece años. Los resultaos de les encuestes son claros nesti sen y nun voi repitir equí cifres y porcentaxes que ya conocemos; namás fai falta dase una vuelta polos llugares de diversión y de xuru que nos convencemos de que los datos que nos dan las estadístiques aproxímense muncho a la realidá. El consumu escesivu d’alcohol, anque seya en fines de selmana y fiestes, trai consigo otros problemes añadíos: adicción, violencia, accidentes de tráficu, delincuencia y consumu d’otres drogues que güei tán presentes nos llugares de “movida”. Per otru llau, rómpese la comunicación familiar, faciéndose difícil el diálogu ente pas y fíos. Y otros efectos a más llargu plazu que yá nos anuncian los profesionales de la salú, como enfermedaes mentales prematures. El problema ye seriu.
Ta claro qu’esti comportamientu d’una bona parte de la mocedá, escapósenos de les manes y esto llevó a la ministra a intentar poner midíes drástiques que protexan la salú de la xuventú española, proyectando una llei seca, que nun ye bien acoyida y que se dulda de la so eficacia si nun se sofita con otres midíes sociales de prevención. Hai munches coses por solucionar que pueden influir n’esti desmadre xuvenil: el paru, los empleos en precariu, los sueldos polos suelos, contratos basura, problemes p’adquirir una vivienda, son dalgunes de les calamidaes sociales que tán sufriendo los xóvenes. Pa solucionar estos problemes tamién habría que llexislar con urxencia.
Y nesta situación social plantéase que la llei nun afecte a les nueses romeríes, espiches nin otros actos festivos, pero, verdaderamente, nun tará mal un poco de control, pa que les fiestes dexen de ser namás qu’un pretestu pa la mocedá pa facer “botellón” ensin enterase de nengún otru actu, porque nun-yos interesa. En munches romeríes y fiestes, hai una total dixebra na forma de viviles; mientres los pas y los güelos, s’esfuercen por mantener les tradiciones festives, la mocedá vive la nueche al son del “botellón” y durme de día ensin interesase por nada más y rompiendo too vínculu comunicativu y familiar. Toos sabemos que nun vamos a pidir a los xóvenes divertise como vieyos, porque esto iría contra la “llei natural”, pero, nos últimos años, percibese tamién nes celebraciones festives el nomáu abismu xeneracional.
Dalgunos espertos nel tema, consideren el vinu, y la sidra como alimentos. Toos sabemos que’l vinu emborracha, la sidra tamién, la cerveza y el calimochu lo mesmo. Too depende de la cantidá que se beba. Lo importante dende llueu ye educar, informar, prevenir, dialogar…educar a los más xóvenes pa un consumu responsable y amparalos socialmente pa que nun pierdan la ilusión y nun s’abelluguen n’notres práctiques de riesgu pa la salú.
Esperemos que la Ministra estudie toles posibilidaes y la redacción de la futura llei nun seya tan drástica como paez; que la so puesta en práutica ayude a meyorar la salú de la población y que nun seya peor el remediu que la enfermedá; que la Sra. Ministra vaya pensando n’otres midíes sociales que favorezan la integración social de la nuesa mocedá. Tampoco hemos escaecenos los adultos de que nós somos l’espeyu nel que se miren los xóvenes.
No hay comentarios:
Publicar un comentario