Bonos propósitos

OPINIÓN
Bonos propósitos
Servicios
Enviar esta página
Imprimir esta página
Contactar
Anterior
Volver
Siguiente
Tolos meses del añu tienen dalguna fecha importante. Abril ye un mes especial, enllenu de primavera y de lluz, los díes son llargos y espléndidos y nesa galanura primaveral celébrase'l Día Internacional del Llibru. El 23 d'abril de 1616 dexáronnos importantes figures de la lliteratura universal: Cervantes, Shakespeare y l'Inca Garcilaso de la Vega. Como si dempués de llenar de lluz esti mundu coles sos maravíes lliteraries, escoyeren la plenitú primaveral pa llenar de palabres poétiques «el más allá». Bien ye verdá qu'esta fecha dalgo tien d'especial. Estos escritores nun morrieron nin morrerán enxamás porque foise'l so cuerpu, pero quedó l'alma nos sos escritos, que siguen embabiecando al públicu llector. Pero, agora que yá pasó esi día, dempués de tolos eventos, toles llectures y discursos; dempués de que s'adxudicara'l prestixosu premiu «Cervantes», que recibió l'escritor Antonio Gamoneda, quédanos un añu por delantre pa nun escaecer toles recomendaciones, p'algamar vezos llectores que s'intenten afitar entamando actos y procurando animar a lleer a la población de toles edaes. Atopámonos ante un mercáu lliterariu de tal magnitú que fai difícil escoyer ente tantos títulos. Quiciabes esta selmana dedicada al llibru munches families merquen nueves obres pa les sos biblioteques, aprovechando que les llibreríes fan un pequeñu descuentu. Pero ¿quedaránse estos llibros nes estanteríes, enllenándose de polvu y esperando que daquién abra les sos páxines? Ye difícil saber cuánta lliteratura se consume. El ritmu de vida que llevamos quita tiempu d'ociu y, amás, la ufierta d'actividaes ye tan variada que-y resta protagonismu a la llectura. Per otra parte, lleer nun ye sólo un placer, porque tamién implica un esfuerzu de concentración, comprensión ya interpretación, y güei, que fuximos de tolo que nos suponga esfuerzu, si nun escoyemos un títulu acertáu, cuerre'l peligru de que'l llibru qu'abrimos con más o menos gana puede quedase pa siempre arrinconáu nun estantería. De toles maneres les cifres son optimistes, l'índiz de llectura n'Asturies sitúase nel 52% y disponemos d'una perbona y bien organizada rede de biblioteques, bien equipaes y debidamente informatizaes. Sin embargu, si pensamos nel públicu infantil, el tópicu que repetimos siempre, profesores y pas, ye que los neños nun lleen, y que tán absorbíos pol mundiu de la imaxe, de los videoxuegos y la televisión. Esto, anque nun ye del too cierto, ye preocupante, porque enxamás se tuvieron tantes facilidaes pa tener un llibru ente les manes como nestos últimos años. Hai munchos neños que son llectores, bonos llectores, que saben disfrutar de la llectura. Pero a una bona parte d'escolinos hai que llevalos de la mano pa intentar enganchalos a la llectura, inda teniendo tan variada oferta lliteraria al so alredor, nun-ys fai gracia nengún títulu. Asina, nuna mesma clase, nuna mesma xeneración d'alumnos hai neños que devoren llibros y otros a los que se-yos caen de les manes. L'accesu a la cultura güei ye muncho más fácil que hai unes décades; el que nun llee ye porque nun quier. Tolos centros educativos tienen biblioteques bien equipaes y casi tolos neños tienen llibros nes sos cases, y, per otra parte, la meyora del nivel cultural sitúa a la población en meyor disposición pa lleer y dixerir la llectura. Poro, pasáu esti renombráu Día del Llibru, quédanos garrar como aniciu d'un añu llector esti espléndidu 23 d'abril y cuando l'añu que vien se repita esta fecha poder cuntar con munchos más títulos lleíos. La llectura ye dalgo pa toles edaes y ente la bona oferta lliteraria siempre atoparemos un llibru a la carta según el nuesu gustu lliterariu. Lo difícil ye tresmitir el gustu pola llectura a quien s'empeña en nun esforciase en saboriar les páxines d'un bon llibru, nin en pisar siquiera una biblioteca.
Inicio